Tersandung Akar Pohon Nangka (Tasonto akar nangka)

Entri ke-3 dar beta sebagai seorang tukang kewel (tukel), akang pung judul "TASONTO AKAR NANGKA"

Kalo memang basudara dong samua su parna pigi ka Ambon pas tanggal 14 Februari, katong di Ambon seringkali biking pesta Valentine. Karena pas tanggal itu tuh ada hari yang namanya hari Kasih Sayang atau Valentine, tapi ana-ana muda macam beta di Ambon, katong kasnama akang hari "seks sedunia." Hahahahahahaaaaa

Ok, katong maso dalam carita "Tasonto Akar Nangka".

Di beta pung kampong (HATU  / di samping Bandara Pattimura LAHA, Kabupaten Maluku Tengah), setiap hari Valentine (Kasih Sayang) biasanya dong disana biking pesta basar. Tapi anehnya disana, pesta yang dong biking tuh bukang par sambarang orang, cuma ada sebagaian orang yang diundang, deng yang maso didalam pesta jua samua pake baju rapi (Kameja, Calana Kaeng, Spatu haleluya). Sebagaian orang itu terdiri dar Pendeta, Majelis, Pengasuh, Ketua Pelwata, Ketua Pelpri, Ketua Angkatan Muda, deng dong pung kenalan-kenalan yang sopan-sopan. 

Anehnya lagi, kalo biasanya pesta pasti akang pung lagu yang tentang cinta-cinta, lagu joget dangdut Ambon, lagu cha-cha deng lagu house music, maar tapi di Hatu dong pung pesta pake lagu rohani!! Hahahahahaha, basudara dong bayangkan jua kalo dangsa deng lagu rohani. Seng lama bagini lagu su babunyi tabaos basar batul di pinggir Kantor Desa Negeri Hatu, karna beta jua terlibat dalam Angkatan Muda sektor itu, beta dapa undangan dar panitia pesta Valentine. Singkat carita ada satu Ibu Pengasuh di Hatu yang cantik, dia pung nama Maya, hayo tuheng, Maya nih jadi bunga pesta tagal dia nih moi batul, puti bagus, rambu seng karibo, idong tinggi, muka seng baminya. Jadi tiap saat lagu babunyi, mau Majelis kah, Ketua Pelpri kah, anggota Pelpri kah, pokoknya sapa sa mau ambe Maya par dangsa. Tiap kali beta badiri par mau ambe Maya, yah siooooo orang su ambe, akhirnya hati ancor kalo tiap kali lia Maya dangsa deng orang laeng, maar supaya jang kala slak, beta loko sabarang aja, mau Tante Ata kah (Ketua Pelwata) mau Tante Ina kah (Kolektan Greja) mau Mba Dewi kah (Tukang Pijat Majelis Jemaat) pokoknya sapa sa, supaya jang kala slak tagal mau ambe Maya maar terlambat.

Satu kali bagini lagu dangsa polo sadap babunyi, akang pung judul "Di Doa Ibuku / yang manyanyi Nikita". Ya tuheng samua mata baliar par maya yang dudu dipinggir pohong nangka, karna dong samua hati subakuti par mau dangsa polo krep maya, beta cuma seng mau kala!!! Pas kata lagu pung intro-intro torompet babunyi, deng satu kali sa mangkali ada dalapang laki-laki satu kali badiri cikar lari par mau ambe Maya dipinggir pohong nangka, tapi maaf e basudara, beta su terlanjur lari kamuka par mau ambe Maya dangsa. Beta lari deng jantong tapukul par ambe Maya, cikar lari seng taku mati, pokoknya sapa yang ada pele beta seng mau tau lai!! Sioooo, tagal mata nih cuma mau lia Maya, mata seng dapa lia kata ada akar pohong nangka paleng basar di muka beta pung kaki, akhirnya basudara samua, beta tasonto akar nangka, jatuh sa tanah di muka Maya pung kaki. Satu kali sa, samua orang dalam pesta tatawa hura tagal beta pung gamang Maya. Pesta Bubar jam 2 malam, tapi beta su pulang dar jam 10 malam tagal akang akar nangka potar tuh... Hahahahahahaaaaaa

Bahasa Sleng orang Ambon

Basar = Besar
Kaeng = Kain
Dangsa = Dansa
Spatu Haleluya = Sepatu Kantor
Moi = Cantik
Baminya = Berminyak
Kala Slak = Salah Tingkah
Tatawa Hura = Tertawa Terbahak-bahak

Kupon Bazaar

Dolo, mungkin sekitar tahun 2009, beta sempat menjadi tukang ojek di depan Swalayan Citra Ambon. Basudara dong pasti tau samua kalo tampa ojek itu tuh tukang ojek samua gobang-gobang.

Ada banya carita lucu waktu beta jadi seorang tukang ojek waktu itu, salah satunya itu carita tentang "Kupon Bazaar."

Satu hari bagini, beta nih ada ojek, beta kaluar par jam 6 sore (jadwal tetap) tembak-tembak orang-orang yang lewat diakang muka jalan tuh. Eh seng lama bagini Tante Mawar (BUKANG NAMA ASLI) kore dar blakang trus bisi-bisi "NYONG OJEK DO". Aduh hati pung sanang langsung, bagemana seng sanang ada baru datang lai langsung penumpang su cari par antar. Beta langsung tanya "Mau antar kemana tante Mawar?." Tante Mawar jawab "KA KUDAMATI NYONG". Ayo tuheng, bae jua Rp.15.000,- su ada.

Singkat carita waktu beta su sampe ditampa tujuan bagini, tante Mawar turun dar motor, trus buka dompet, abis itu antua bilang "NYONG, JANG MARAH TANTE SENG ADA UANG LAY, TANTE KASI NYONG KUPON BAZAAR ES KRIM HALIM JUA E."  "Demi tuhan, ini batul kah?" (batanya dalam hati yang ada ancor tagal akang kupon tuh). Yaudah, tagal beta lia harga kupon jua Rp.20.000,- jadi seng apa-apalah. Basudara tau seng, dalam satu hari tuh, beta ojek seng ada penumpang satu lai yang beta bawa. Ininih samua tagal seng ada pancingan LARIS, bagemana mau laris kalo yang pancing bukang uang mar tapi Kupon Bazaar?????????????????..

Akang pung esok bagini waktu mau pigi ambe akang bazaar es krim tuh, yah sioooo, ujang turung pung kuat sampe Ambon banjir skali.. Akhirnya Kupon Bazaar Potar tuh angos.. Hahahahahahaha, ayo Tante Mawar e, mar su talalu lai.....


* Kore = Sentuh *Tuheng = Tuhan *Bisi-bisi = Bisik-bisik

Bbm naik, yang turun apa?

Hai basudara satudara barana ana samua

 

Ini untuk pertama kalinya beta maeng blog deng hape. Jadi kalo nanti dong samua lia huruf takaruang, jang marah beta jua jantong hati pisang rabus ee.

 

Dong samua tau toh kalo BBM nih su nai harga.

Jadi carita nih bagini : "Om Cale, om Cale tau seng kalo skarang nih BBM su nai, sayor jua nai, ikang-ikang nai, apalai sagu, ya tuhang jang bilang lai. Tapi om Cale, apa sa yang turung lah? (om cale jawab) NYONG MANIS, YANG TURUNG TUH CUMA CALANA, TAPI YANG TURUNG DRASTIS TUH OMA-OMA PUNG KARSANG.

 Hahahaha, sio om Cale kanapa oma-oma pung karsang yang turung drastis? (om Cale jawab) LA KALO LUTU-LUTU SU REU TUH KASTURUNG KARSANG SENG PAKE LAMA NYONG, NANTI KARSANG TALUCU KA BAWAH SANDIRI. Hahahaha, Om Cale kaco....

 

*Karsang = Calana Dalam *Reu = Su Seng Kuat *Lutu-lutu = Lutut Lutut